Украинанын президенти Владимир Зеленский украин күчтөрү Донецк жана Луганск облустарын көзөмөлдөгөн аймактарды таштап кетпей турганын билдирди. Бул туурасында Зеленский шейшемби кечинде журналисттер менен баарлашкан учурда айтты.
“Биз Донбасстан кетпейбиз, аны кыла да албайбыз. Баары биринчи бөлүмдү унутуп жатышат - биздин аймактарды мыйзамсыз басып алышкан. Донбасс орустар үчүн келечекте жаңы чабуулдар үчүн плацдарм болот. Эгерде биз Донбасстан өз эркибиз менен кетсек же бизди ошого мажбурлашса, үчүнчү согушту ачабыз”, - деп билдирди Зеленский.
Украин президенти азыр согушту токтотуу үчүн кайсы бир аймакты берүү керек деген позиция туура эместигин, мындай шартта учурдагы бийлик жаңы аймактарды басып алуу аракетин улантарын кошумчалаган.
Ага чейин Зеленский Аляскада өтчү АКШ жана Орусиянын саммитинин жыйынтыгын Киев тааныбай турганын билдирген. Ал Трамп менен Путиндин жолугушуусу АКШ менен Орусиянын эки тараптуу мамилеси үчүн мааниси чоң болорун белгиледи. Зеленский бул жолугушууну Путиндин “жеке жеңиши” катары сыпаттады.
15-августта АКШ президенти Дональд Трамп менен Владимир Путин Аляскада жолукканы жатат. Андагы негизги тема Украинадагы согушту токтотуу экенин Ак үй кабарлаган. Бул жолугушуу Путиндин суранычы менен өтүп жатканын Ак үйдүн маалымат катчысы Кэролайн Левитт билдирген. Ал жолугушуу Альяскадагы Анкориж шаарында өтөрүн ырастады.
АКШ президенти Дональд Трамп Путиндин суранычы боюнча аны менен жолукканы жатат. Бул туурасында Ак үйдүн маалымат катчысы Кэролайн Левитт билдирди.
Ал мындай маалыматты Аляскада өтчү жолугушууга эмне себептен украин президенти Владимир Зеленский чакырылган жок деген суроого жооп берип жатып шардана кылды.
“Путин Москвага сапар менен барган АКШ президентинин чабарманы Стив Уиткофф аркылуу жолугушууну суранган. Ошондуктан АКШ президенти Путиндин өтүнүчүнүн негизинде жолугушууга макул болду. Бул жолугушуунун максаты согушту токтотуу үчүн эмне кыла аларыбызды аңдап түшүнүү”,- деди Левитт.
Ак Үйдүн өкүлү жолугушуу Аляскадагы Анкориж шаарында өтөрүн ырастады.
12-августта АКШ мамлекеттик катчысы Марко Рубио менен орус тышкы иштери министри Сергей Лавров эки президенттин жолугушуусун уюштурууну телефондон талкуулаган.
Украинанын чалгындоо башкармалыгынын дрондору Орусиянын Оренбург шаарындагы ракеталарды даярдоодо керектелчү гелий өндүргөн заводду бутага алышты.
Жергиликтүү тургундар өткөн түнү завод тарапта жарылуу болуп, ал жакка барчу жолдор жабылганын кабарлашты. Жергиликтүү бийликтер окуяны ырастаган жок.
12-августта Оренбург, Казань, Саратов, Нижний Новгород, Нижнекамск, Пензада аэропорттор убактылуу жабылганы Телеграмда кабарланды. Буга чейин да бир катар шаарларга аба каттамдары токтотулган. Бийликтер учуу коопсуздугу камсыздалмайынча ушундай чечим кабыл алышканын маалымдашты.
Украинанын маалымат каражаттары орус армиясы Донецк облусундагы Покровск багытында 11 чакырымдай алдыга жылып, Краматорск шаарына барчу жолду да бууп салганын билдиришти.
"Покровск, Мирноград шаарлары орус аскерлеринин курчоосунда калды. Кризистик кырдаал түзүлдү", - деп жазды украин аскер штабынын өкүлү Телеграм каналындагы баракчага.
Дүйшөмбүдө кечинде орус армиясынын Донецк облусундагы Белозерское шаарындагы көп кабаттуу үйгө тийген дрон чабуулунан кеминде эки жай турган каза болуп, дагы он чакты киши, арасында жаш балдар жарадар болгону кабарланды.
АКШнын президенти Дональд Трамп ушул аптада күтүлүп жаткан орус президенти Владимир Путин менен жолугушуудагы башкы максаты Украинадагы согушту токтотуу экенин айтты. Бул тууралуу дүйшөмбү күнкү маалымат жыйынында билдирди. Трамптын айтымында, учурда согушуп жаткан эки өлкөнүн башчыларынын жолугушуусун уюштурууну көздөп жатат.
“Акыр-аягында мен аларды бир бөлмөгө киргизип, жолуктурам. Ал жерге мен катышышым мүмкүн, балким катышпайм. Бирок мен (жаңжалды) чечебиз деп ойлойм”, - деп билдирди.
Дональд Трамп 15-августка белгиленген Путин менен жолугушуу сыноо иретинде болорун кошумчалады. Кошмо Штаттардын лидери Украина менен Орусиянын ортосундагы арачылык аракеттерди токтотуп коюшу мүмкүн экенин четке каккан жок. Бирок Украинадагы согушту токтотуу үчүн жолугушууларды уюштуруп жатканын, анын жүрүшүндө айрым аймактарды алмашуу да болушу мүмкүндүгүн билдирди. Трамп бул келишим эки тарапка тең ыңгайлуу болушу керектигин тактады.
Буга чейин Владимир Зеленский Украина өз аймагын кимдир-бирөөнө бербей турганын билдирген эле.
АКШнын президенти Дональд Трамп менен Орусиянын президенти Владимир Путин 15-августта Альяскада жолугары кабарланган. Анда Украинадагы согушту токтотуу боюнча сүйлөшүү болору күтүлүүдө. АКШ жана Орусиянын лидерлеринин жолугушуусу тууралуу сөз өткөн аптада АКШнын атайын өкүлү Стив Уиткофф Москвага барып, Путин менен сүйлөшүүлөрдү өткөргөн соң айтылган.